Башҡортостан Президенты Рөстәм Хәмитов эш сәфәре менән Октябрьский ҡалаһында булды. Бында ул 1-се ҡала дауаханаһының яңы хирургия бүлексәһен асыу тантанаһында ҡатнашты, ошо төбәктәге “Өйәҙе-Тау” тау саңғыһы комплексының инфраструктураһы менән танышты.
1-се ҡала дауаханаһының хирургия бүлексәһе бынан өс йыл элек яңыртыла башлағайны. Уның заманса яңы бинаһын төҙөүгә ҡала һәм республика бюджеттарынан барлығы 156 миллион 450 мең һум аҡса бүленгән. Подрядсыларҙың тырышлығы менән медицина хеҙмәткәрҙәренең күптәнге хыялы, ниһайәт, тормошҡа ашты. Республиканың көнбайыш төбәгендә бындай мөһабәт медицина объекттары төҙөлгәне юҡ ине әле.

Бөрө ҡалаһындағы физкультура-һауыҡтырыу комплексын асҡандан һуң, Башҡортостан Президенты Рөстәм Хәмитов ҡала спортсылары менән осрашып аралашты. Һөйләшеү Бөрөлә генә түгел, тотош республикала спортты үҫтереүгә арналды.
Республикала спорт объекттарын төҙөү буйынса программа эшләнгән һәм ул тормошҡа ашырылып килә. Быйыл ғына республикала унлап физкультура-һауыҡтырыу комплексы асыласаҡ. Рөстәм Зәки улы әйтеүенсә, 2013 – 2014 йылдарҙа һәр район үҙәгендә һәм ҡалала спорт комплексы буласаҡ.
Әле Башҡортостан Рәсәй һәм донъя кимәлендәге спорт ярыштары үткәреүгә әҙерләнә.

Кисә Бөрө халҡы өсөн күптән көтөлгән шатлыҡлы ваҡиға булды: унда тәүге физкультура-һауыҡтырыу комплексын астылар. Бөрөләрҙең шатлығын уртаҡлашырға Башҡортостан Президенты Рөстәм Хәмитов та килде. Ҡала халҡы уны тулҡынланып көтөп алды, сөнки комплекстың асылыуында Президенттың ярҙамы ғәйәт ҙур булды.
Яңы комплекс ҡала халҡына ысынлап та бик кәрәк ине. Быға тиклем бында бер бассейн да булмауы ғәжәпләндерә. Хәҙер яңы бассейн сменаһына 32 кешене ҡабул итә ала. Унда ҡала һәм республика кимәлендәге спорт ярыштары үткәреү мөмкинлеге бар. Бынан тыш, яңы комплекста ҙур универсаль спорт залы, ике тренажер һәм фитнес менән шөғөлләнеү залдары, сауна, массаж бүлмәһе, буфет эшләй.
2010 йылдың көҙөндә башланған төҙөлөш башта бер фирмаға йөкмәтелә, тик ниндәйҙер сәбәптән уларҙың ҡулынан килмәй, һәм эш туҡтап ҡала. Аҙаҡ ҡорамалдар менән дә проблема килеп сыға. 2011 йыл аҙағында файҙаланыуға тапшырылырға тейешле бинаны төҙөү туҡтап ҡала.

16 февралдә Башҡортостан Президенты Рөстәм Хәмитов РФ Президенты күрһәтмәләрен үтәү мәсьәләләре буйынса видеоселектор кәңәшмәһендә ҡатнашты. Кәңәшмәне Рәсәй Президенты Дмитрий Медведев алып барҙы.
Унда Бөйөк Ватан һуғышы ветерандарын торлаҡ менән тәьмин итеү, торлаҡ-коммуналь хужалыҡ өлкәһендәге айырым мәсьәләләрҙе хәл итеү, өс һәм унан күберәк бала тәрбиәләгән ғаиләләргә ер участкалары биреү буйынса ҡушылған эштәрҙе үтәү мәсьәләләре ҡаралды.

15 февралдә Яр Саллыла Башҡортостан Президенты Рөстәм Хәмитов Рәсәйҙә демографик сәйәсәтте һәм һаулыҡ һаҡлауҙы яңыртыуҙың төбәк программаларын тормошҡа ашырыу мәсьәләләре буйынса Хөкүмәт Рәйесе Владимир Путин үткәргән кәңәшмәлә ҡатнашты. Унда тыуымды арттырыу, үлем осраҡтарын кәметеү саралары, 2012 йылдан һаулыҡ һаҡлау тармағын яңыртыу бурыстары ҡаралды.
Башҡортостанда 2025 йылға тиклемге демографик сәйәсәт концепцияһы раҫланған. Республикала демографик хәл яҡшыра: тыуым кимәле (2011 йылда 1 мең кешегә — 13,7) үлемдән (1 мең кешегә — 13,4) юғарыраҡ, халыҡтың тәбиғи артымы теркәлә.