Фатима менән Сәрүәр Һибәтовтар Рыҫҡужа ауылында хөрмәткә лайыҡ ғаиләләрҙән һанала.
Ғаилә башлығы хаҡлы ялға сыҡҡансы Амангилде урта мәктәбендә балаларға географиянан белем бирҙе. Күп йылдар пропагандист булып эшләне, шулай уҡ “Башҡортостан” гәзитен таратыуға ҙур өлөш индергәне өсөн редакцияның бүләген ҡәҙерләп һаҡлай. Сәрүәр ағайҙың тырыш хеҙмәтен юғары баһаланылар – ул “Башҡортостандың мәғариф отличнигы” тигән маҡтаулы исемде йөрөтә.
Фатима апай – шиғри күңелле әсә. Уның ике шиғырҙар китабы донъя күрҙе.
Һибәтовтар районыбыҙҙа “Өлгөлө ғаилә” исеменә лайыҡ булды. Улар бына тигән өс ул тәрбиәләп үҫтерҙе. Айбулат менән Йәүҙәт, аталарының юлын дауам итеп, райондың Ҡаҙмаш урта мәктәбендә балаларға ғилем серҙәрен аса, ә Фәрит урман техникумын тамамлап, ошо өлкәлә эшләй.

Кәримә Усманованың “Урланған бала саҡ” (“Башҡортостан”, 7 октябрь, 2011 йыл) тигән мәҡәләһен уҡығас, алты йәшлек Әҙилә менән ике йәшлек Рәмиләнең һәм имен булмаған ғаиләләрҙә үҫеүсе башҡа балаларҙың яҙмышы тураһындағы уйҙар тынғы бирмәне.
Ғаиләһен түгел, ә кәйеф-сафа ҡороуҙы өҫтөн ҡуйыусы әсәнең йәшәү рәүеше лә, башҡа һыймаҫлыҡ ҡылығы ла сабыйҙарҙы ауыр шарттарҙа үҫергә мәжбүр итә. Ҡыҙҙарҙың иҫерек әсәне һағалап урманда төн уҙғарыуы йөрәкте әрнетә.

Бөйөк рус яҙыусыһы А.П. Чехов, кеше һәр йәһәттән матур булырға тейеш: кейеме лә, уйҙары ла, тигән. Һүҙ юҡ, ҡарап туйғыһыҙ күркәм кейенәбеҙ хәҙер. Тик бына уйҙарыбыҙҙың гүзәл булыуына икеләнәм.
Мин — йәш әсә, көн дә бер ҡыҙымды балалар баҡсаһына, икенсеһен мәктәпкә илтәм. Ара алыҫ ҡына булғанлыҡтан, автобуста барырға тура килә. Алдымда тәтәй кеүек кейенгән ҡыҙҙар, егеттәр ултыра. “Балалар һәм инвалидтар өсөн” тип яҙылған махсус урындарҙа ла типһә тимер, баҫһа баҡыр иҙерлек ир-егеттәр “иҙрәй” йәки затлы тун кейгән ханымдар урамды күҙәтеп бара. Әммә улар бала күтәргән ҡатынды ла, бәлтерәп бөткән әбей-бабайҙы ла күрмәй.

“Булыр бала — биләүҙән”, ти беҙҙең халыҡ. Илһөйәрлек нигеҙҙәре лә сабый күңеленә бәләкәйҙән һалынырға тейеш. Үҫеп килеүсе быуынды ошо йүнәлештә тәрбиәләү ата-әсәнең генә түгел, балалар баҡсаһы тәрбиәселәре алдына ла ҙур бурыс ҡуя.
Үҙ илен, халҡын яратҡан кеше башҡа милләттәрҙе лә ихтирам итәсәк. Стәрлетамаҡ ҡалаһының 4-се “Аҡбуҙат” балалар баҡсаһы эшмәкәрлегендә ошо бурыстарҙың барыһы ла күҙ уңында тотола.

Күптән инде биш балаға әсәймен. Нисә тапҡыр шул сабыйҙарға ҡушылып шатланғанмын, илағанмын, ауырығанмын һәм яңынан терелгәнмен!.. Ауылыбыҙ мәктәбендә уҙған “Әсә — шәфҡәт диңгеҙе” тигән әҙәби-музыкаль кисәнән һуң ошо кисерештәрҙең бушҡа булмағанлығына төшөндөм.
Зауыҡлы итеп биҙәлгән зал, балаларҙың үҙ ҡулы менән эшләгән бүләктәре күңелдәргә хуш килде. “Әсәйем, һин берҙән-бер генә!” тигән темаға һәр бала дүрт юллыҡ шиғыр ҙа яҙғайны. “Әсәйем, йәнем һин” йырын башҡарыуҙары кисәнең иң тулҡынландырғыс мәле булғандыр. Бай йөкмәткеле сара ойошторғаны өсөн уҡытыусы Венера Бакироваға рәхмәт.